हेटौँडा, ३ असोज । म्यानमारको एक विद्यालयमा सेनाको हेलिकोप्टरबाट गोली प्रहार हुँदा ११ जना बालिबालिको मृत्यु भएको छ । सोही घटनामा १५ जना सम्पर्कबिहीन बनेका छन् ।

उत्तरी म्यानमारको सांगेन प्रान्तमा रहेको एक विद्यालयमा सेनाको हेलिकोप्टरबाट गरिएको गोली प्रहारमा बालकालिकाको मृत्यु भएको हो । विद्यालयमा विद्रोही लडाकुहरु आश्रय लिएर बसेको आशंकामा सेनाले आक्रमण गरेको अनुमान गरिएको छ ।

मृत्यु हुने बालबालिकाको उमेर ७ देखि ११ वर्षको रहेको छ । उनीहरुको शव सेनाले नै लगेको बुझिएको छ । यसैबीच युनिसेफले सेनाको ज्यादतीको विरोध गर्दै सम्पर्कबिहीन १५ बालबालिकालाई मुक्त गर्न अपील गरेको छ । युनिसेफले शोक सन्तप्त परिवारजनप्रति समवेदना समेत प्रकट गरेको छ । युनिसेफले बालबालिको जिउधनको रक्षा गर्न म्यानमार सरकारको ध्यान केन्द्रित गरेको हो ।

म्यानमारको सरकारले प्रजातन्त्र पक्षधर र बिद्रोहीहरुमाथि निर्मम दमन गर्दै आएको छ । पछिल्लो समय सैनिक कुपछि त्यहाँ २३ सय भन्दा धेरै मानिस सेनाबाट गरिएको कारबाहीमा मृत्यु भएको छ । सैनिक कारबाहीका कारण म्यानमारबाट ५ लाख सर्वसाधारण विस्थापित भइसकेका छन् ।