हेटौँडा, १३ असोज । नेकपा (एकीकृत समाजवादी) का अध्यक्ष माधवकुमार नेपालले राजनीतिमा भ्रष्टाचारी प्रवृत्ति बढेकाले नेताहरूले विश्वास गुमाउँदै गइरहेका बताउनुभएको छ ।
आज बिहीवार अखिल नेपाल महिला सङ्घ (समाजवादी) ले दशैँ, तिहारलगायतका चाडपर्वको अवसरमा आयोजना गरेको शुभकामना आदानप्रदान तथा चियापान कार्यक्रममा बोल्दै अध्यक्ष नेपालले राजनीतिमा भ्रष्टाचारी प्रवृत्ति व्याप्त रहेको बताउनुभएको हो । उहाँले राजनीतिमा चरम भ्रष्टाचारी प्रवृत्ति बढ्नाले नेताहरूले विश्वास गुमाउँदै गइरहेका बताउनुभयो । नेताहरूले विश्वास गुमाउँदै गइरहेको कुराले आफूलाई चिन्तित बनाएको पनि उहाँको गुनासो छ ।
अध्यक्ष नेपालले मानिसहरूमा आफूले पटक–पटक अवसर पाउँदा ठिक ठान्ने र अरूले एक पटक अवसर पाउँदा पनि त्यसलाई सकारात्मकरूपमा नलिने प्रवृत्ति बढेको बताउनुभयो । आफूले पाएको छैन भने अनुहार अँध्यारो हुने र पाएको छ भने छोइनसक्नु हुने भन्दै उहाँले टिप्पणी गर्नुभयो ।